ပလောင်လွတ်မြောက်ရေးတပ်ဦးPSLFအဖွဲ့နဲ့ ပြည်ထောင်စုငြိမ်းချမ်းရေး ဖော်ဆောင်ရေးလုပ်ငန်း ကော်မီတီ အဖွဲ့တွေ ဇူလိုင်လ ၃၁ ရက်နေ့မှာ တရုတ်မြန်မာနယ်စပ်မူဆယ်မြို့မှာ တွေ့ဆုံဆွေးနွေးမယ်လို့သိရပါတယ်။
ဒီဆွေးနွေးပွဲမှာတခြားတိုင်းရင်းသားလက်နက်ကိုင်အဖွဲ့တွေကိုလည်း လေ့လာသူအဖြစ် တက်ရောက်နိုင်ဖို့ စီစဉ်ထားတယ်လို့ သိပါတယ်။
ရှမ်းပြည်မြောက်ပိုင်းမှာ အစိုးရတပ်တွေနဲ့ တိုက်ပွဲတွေမကြာခဏဖြစ်နေတဲ့တအောင်းအမျိုးသားတပ်မတော် TNLA ရဲ့ နိုင်ငံရေး ဦးဆောင်အဖွဲ့ဖြစ်တဲ့ PSLFအဖွဲ့နဲ့ အစိုးရငြိမ်းချမ်းရေးလုပ်ငန်း ဖော်ဆောင်ရေးကော်မီတီ အဖွဲ့တွေ မူဆယ်မြို့မှာတွေ့ဆုံဖို့ နှစ်ဖက်သဘောတူသတ်မှတ်ထားတယ်လို့အဲဒီ ဆွေးနွေးပွဲမှာ ဦးဆောင် ပါဝင်မယ့် PSLF အဖွဲ့ရဲ့ အထွေထွေအတွင်းရေးမှုး မိုင်ဖုန်းကျော်က ပြောပါတယ်။
ဒီဆွေးနွေးပွဲမှာ PSLF အဖွဲ့အနေနဲ့ ကေအိုင်အို၊ ကေအဲန်ယူ၊ မွန်ပြည်သစ် ပါတီ NMSP၊ UWSA ၀ အဖွဲ့နဲ့ ရှမ်းပြည်တိုးတက်ရေးပါတီSSA/SSPPနဲ့တခြားတိုင်းရင်းသားလက်နက်ကိုင်အဖွဲ့အတော်များများကို လေ့လာသူ အဖြစ်တက်ရောက်ဖို့ ဖိတ်ကြားထားတယ်လို့လည်း သိရပါတယ်။
နှစ်ဖက်ဆွေးနွေးကြမယ့် အကြောင်းအရာအချို့ကို မိုင်ဖုန်းကျော်က ခုလို ဆက်ပြောပြပါတယ်။
"သူတို့ဘက်ကတော့ အပစ်အခတ်ရပ်စဲရေးတွေ ဆွေးနွေးရမယ်၊ ပြီးတော့ နေရာသတ်မှတ်ရေးတွေ လုပ်မယ်၊ နှစ်ဖက်လက်နက်မပါပဲနဲ့ သွားနိုင်တဲ့နေရာတွေ ဆွေးနွေးရမယ်၊ ပြီးတော့ ဆက်ဆံရေးရုံးဖွင့်မယ်၊ ဒါသူတို့ဘက်ကတင်ပြတာပေါ့၊ကျနော်တို့ဘက်ကလည်း နိုင်ငံရေးတွေ့ဆုံဖို့ကိစ္စ ဆွေးနွေးရမယ်၊ နှစ်ဖက် စစ်ဆင်ရေးလျော့ဖို့ ဘယ်လိုလုပ်ရမလဲ စသဖြင့် ပြီးတော့ စစ်ဘေးဒုက္ခသည်တွေကို စစ်ဘေးရောက်နေတဲ့ ရွာတွေကို ဘယ်လိုလုပ်မလဲစသဖြင့် ကျနော်တို့ဘက်ကတော့ ဒါတွေပြောထားပါတယ်၊ ဒါပေမယ့် အတိ အကျကတော့ အစည်းအဝေးရောက်မှပဲ ပိုပြီးတိတိကျကျသိရမယ်လို့ ထင်ပါတယ်"
ပလောင်ပြည်နယ်လွတ်မြောက်ရေးတပ်ဦးPSLFနဲ့အစိုးရငြိမ်းချမ်း ရေးဖော်ဆောင်ရေးလုပ်ငန်းကော်မီတီတို့ လွန်ခဲ့တဲ့နှစ်က ထိုင်းနိုင်ငံမှာ အလွတ်သဘောတွေ့ဆုံဆွေးနွေးပြီးနောက် အခုဆွေးနွေးပွဲဟာ ပထမဆုံး တရားဝင်တွေ့ဆုံဆွေးနွေးကြမှာ ဖြစ်ပါတယ်။
ရှမ်းပြည်မြောက်ပိုင်း ပလောင်ဒေသအတွင်းမှာ လက်ရှိနောက်ဆုံး အခြေ အနေအရ နှစ်ဖက်တပ်တွေ မကြာခဏ တိုက်ပွဲတွေ ဖြစ်နေပြီး ဒီကနေ့လည်း ကွတ်ခိုင်ဒေသမှာ တိုက်ပွဲဖြစ်ပွားခဲ့တယ်လို့ သိရပါတယ်။
By: RFA Burmese
0 comments:
Post a Comment