၂၀၀၉ ခုနှစ်တွင် အ.န.ဖ စစ်အစိုးရအဖွဲ့မှ အပစ်ခတ်ရပ်စဲထားသောကာလ အနှစ်(၂၀) ပြည့်ပြီဖြစ်၍ အပစ်ရပ်ကာလကုန်ဆုံးပြီဖြစ်ကြောင်း။ထားဝရငြိမ်းချမ်းရေးဖေါ်ဆောင်ရန်အတွက် ၄င်းတို့နှင့် အပစ်ရပ် ထားသောအဖွဲ့များ၏တပ်ဖွဲ့များကို အစိုးရ၏ဗမာ့တပ်မတော်လက်အောက်တွင် နယ်ခြားစောင့်တပ်(BGF) အဖြစ်၊သို့မဟုတ် ပြည်သူ့စစ်များအဖြစ်အသွင်ပြောင်းရမည်ဟုဖိအားပေးအကြပ်ကိုင်လာသည်။
တပ်ကိုအသွင်ပြောင်း အပ်နှံပြီးပါက နိုင်ငံရေးဦးဆောင်အဖွဲ့များမှ ရွေးကောက်ပွဲဝင်နိုင်သည်ဟု ဆိုလာပါ သည်။ ထိုသို့တောင်းလာသည့်အခါ နိုင်ငံရေးပြသနာများကို ဆွေးနွေးဖြေရှင်းရန် လိုလာတောင်းဆိုလာ ကြသောအဖွဲ့များက နိုင်ငံရေးအရ ဆွေးနွေးဖြေရှင်းခြင်းအလျင်မပြုပဲ မိမိတို့တပ်ကို အဖျက်သိမ်းခံ အပ်နှံ ခြင်းမပြုနိုင်ကြောင်း။စစ်အာဏာရှင်စနစ်အောက်တွင်မိမိတို့၌တပ်အင်အားမရှိပါက နိုင်ငံရေးအရလှုပ်ရှားရန် အခွင့်အလမ်းရှိနိုင်တော့မည်မဟုတ်ဟု အမြင်ရှိကြသည်။ တပ်ကိုမအပ်ပါကလက်နက်ကိုင် ပဠိပက္ခပြန်ဖြစ် လာမည်ကိုမြင်ပြီးတိုက်ပွဲဝင်နေသောဘ၀တူတိုင်းရင်းသားတော်လှန်ရေးအင်အားစုများနှင့် ပြန်လည်ပူးပေါင်း လုပ်ဆောင်သွားကြရန် လျှို့ဝှက်တွေ့ဆုံညှိနှိုင်းခဲ့ကြသည်။
န.အ.ဖစစ်အစိုးရသည်အပစ်ရပ်အဖွဲ့များအား၂၀၁၀ခု၊ဧပြီ(၂၂)ရက်နောက်ဆုံးထားပြီးတပ်အသွင်ပြောင်းလဲ ရေးကို လက်ခံ၊မခံ အကြောင်းပြန်ကြားရန်။လက်မခံလျှင်ဖြစ်စေ၊ အကြောင်းမပြန်ကြားလျှင်ဖြစ်စေ တရားမ၀င်အဖွဲ့အစည်းများအဖြစ်သတ်မှတ်ပြီး ယခင်အပစ်မရပ်မီကာလကကဲ့သို့ သဘာထားမည်ဟု ဆိုလာသည်။ ထိုအခြေအနေတွင် အဖွဲ့တချို့မှာ ဖိအားမခံနိုင်ပဲ လက်ခံသွားကြသော်လည်း အဖွဲ့ကြီးများက လက်မခံပဲ မိမိကိုယ်ကိုခုခံကာကွယ်ရန် ပြင်ဆင်ကြရသည်။ဘ၀တူ တိုင်းရင်းသား တော်လှန်ရေး အင်အား စုများ စုစည်း လက်တွဲတိုက်ပွဲဝင်သွားကြရန် နည်းလမ်းရှာလာကြသည်။စစ်အစိုးရသည် ၂၀၁၀ ခု၊ စက်တင်္ဘာလ(၁)ရက်နေ့တွင်တပ်အသွင်ပြောင်းခြင်းကိုလက်မခံသောအဖွဲ့များအားလက်နက်အပ်ကြရန်၊ မအပ်ပါကအရေးယူတိုက်ခိုက်မည်ဟုဆိုလာပြန်သည်။ထိုသို့ပြောလာသော်လည်း မည်သည့်အဖွဲ့ကမျှ လက်နက်မအပ်ကြပါ။
ဤအခြေအနေတွင် ယခင်အပစ်ရပ်အဖွဲ့များဖြစ်ကြသော KIO , MMSP , SSPP မှ ခေါင်းဆောင်များနှင့် တိုက်ပွဲဝင်နေဆဲဖြစ်သော KNU, KNPP ,CNF အဖွဲ့တို့မှခေါင်းဆောင်များ တွေ့ဆုံညှိနှိုင်းကြပြီး ၂၀၁၀ ခု နိုဝင်္ဘာလ (၄)ရက်နေ့တွင် ဖက်ဒရယ်ပြည်ထောင်စုပေါ်ထွန်းရေးကော်မီတီ ( Committee for Emergence of Federal Union – CEFU ) ကို ဖွဲ့စည်းခဲ့ကြသည်။ CEFU၏ ထူးခြားချက်သည် အပစ်ရပ်နှင့် အပစ်မရပ်လက်နက်ကိုင်အဖွဲ့အစည်းများ စုစည်းပေါင်းစပ်ထား ခြင်းဖြစ်သည်။ CEFU ဖွဲ့စည်းဖြစ်ပေါ်လာရေးနှင့် မဖွဲ့စည်းမီခေါင်းဆောင်များ တွေ့ဆုံနိုင်ရေးတို့တွင် (ENC)မှ ငွေကြေးအပါအ၀င် အကူအညီများစွာပေးခဲ့သည်။
CEFU ပေါ်လာပြီးနောက် တိုင်းရင်းသားအင်အားစုများဖြင့် စုပေါင်းဖွဲ့စည်းထားကြသော NDF , ENC , CEFU တို့ကို ဆက်စပ်စုစည်းနိုင်ရန် နည်းလမ်းရှာကြသည်။ UNLD_LA အပါအ၀င် ထိုအဖွဲ့များ၏ ကိုယ်စား လှယ်များ စုပေါင်းပြီးတိုင်းရင်းသားလူမျိုးများညီလာခံတရပ်ကိုခေါ်ယူကျင်းပခဲ့သည်။
၂၀၁၁ခု၊ ဖေဖေါ်ဝါရီလ (၁၂) ရက်နေ့မှ (၁၆) ရက်နေ့အထိ ကျင်းပသောတိုင်းရင်းသား လူမျိုးများညီလာခံ တွင် ညီညွတ်သော တိုင်းရင်းသား လူမျိုးများဖက်ဒရယ်ကောင်စီ ( United Nationalities Federal Council _UNFC ) ကို စတင် ဖွဲ့စည်းလာခဲ့သည်။ CEFUကိုလည်းဖျက်သိမ်းခဲ့သည်။ ၎င်းနောက် မေလ(၉) ရက်နေ့မှ (၁၂) ရက်နေ့ အထိ နိုင်ငံရေး ဦးဆောင်ကော်မီတီဝင်များ ဗဟိုအလုပ်အမူဆောင်အဖွဲ့ဝင်များနှင့် အဖွဲ့ဝင် အဖွဲ့အစည်း အချို့မှ ခေါင်းဆောင်များ ပါဝင်သောမျက်နှာစုံညီ အစည်းအဝေးတရပ်ကိုကျင်းပပြီး လုပ်ငန်းချောမွေ့ လျှင်မြန်စွာ လည်ပတ်နိုင်ရန် ပြင်ဆင်မှုအချို့ကို ချမှတ်လုပ်ဆောင်ခဲ့သည်။ ဤသို့ဖြင့် UNFC ပေါ်ပေါက် လှုပ်ရှားလာခဲ့သည်။
ဦးတည်ချက်။ ။ UNFC၏ နိုင်ငံရေးဦးတည်ချက်ပန်းတိုင်သည် အမျိုးသားတန်းတူရေးနှင့် ကိုယ်ပိုင်ပြဌာန်း ခွင့်ရှိသည့် စစ်မှန်သော ဖက်ဒရယ်ပြည်ထောင်စုတည်ဆောက်ရေးဖြစ်သည်။
ရည်ရွယ်ချက်များ။ ။ UNFCသည်-
(၁) စစ်မှန်သော တိုင်းရင်းစည်လုံးညီညွတ်ရေးကို တည်ဆောက်ရန်၊
(၂) အဓွန့်ရှည်တည်တံ့ခိုင်မြဲသော ငြိမ်းချမ်းရေးကို တည်ဆောက်ရန်၊
(၃) စစ်မှန်သောပါတီစုံဒီမိုကရေစီစနစ်ကို ဖေါ်ဆောင်ရန်၊
(၄) တိုင်းရင်းသားလူမျိုးများအားလုံး ထာဝစဉ်ငြိမ်းချမ်းစွာ အတူယှဉ်တွဲ ပူးတွဲ ပေါင်းနေထိုင်သွားနိုင်ရန်အတွက်လွတ်လပ်မူ၊တရားမျှတမူနှင့်တန်းတူမူရှိသောဖက်ဒရယ် ပြည်ထောင်စုကို တည်ဆောက်ရန် ရည်ရွယ်ထားပါသည်။
တော်လှန်ရေးလမ်းစဉ် ။ UNFC၏ မဟာဗျူဟာ တော်လှန်ရေးလမ်းစဉ်သည် နိုင်ငံရေးနှင့်စစ်ရေးကို ဟန်ချက် ညီညီ ကျင့်သုံးသွားမည်။ငြိမ်းချမ်းစွာ တွေ့ဆုံဆွေးနွေးအဖြေရှာရေးအတွက် အစဉ်အမြဲ တံခါးဖွင့် ထားသည်။
UNFC တွင်ပါဝင်သော အဖွဲ့အစည်းများ-
.................................................................
၁။ ကချင်ပြည်လွတ်လပ်ရေးအဖွဲ့ (KIO)
၂။ ကရင်အမျိုးသားအစည်းအရုံး (KNU)
၃။ ကရင်နီအမျိုးသားတိုးတက်ရေးပါတီ (KNPP)
၎။ ချင်းအမျိုးသားတပ်ဦး (CNF)
၅။ မွန်ပြည်သစ်ပါတီ (NMSP )
၆။ ရှမ်းပြည်တိုးတက်ရေးပါတီ ( SSPP)
၇။ ရခိုင်ပြည်အမျိုးသားကောင်စီ ( ANC)
၈။ ပလောင်ပြည်နယ်လွတ်မြောက်ရေးတပ်ဦး (PSLF)
၉။ပအိုဝ်းအမျိုးသားလွတ်မြောက်ရေးအဖွဲချုပ် (PNLO)
၉။ လာဟူဒီမိုကရက်တစ်သမဂ္ဂ(LDU)
၁၁။ ၀ အမျိုးသားအဖွဲ့ချုပ် (WNO)
UNFC-လက်ကမ်းစာစောင်မှ ရယူဖော်သည်။
0 comments:
Post a Comment